Mia in Trier
Am Freitag, den 13. Juli san 25. Squaredancer zu dem lange erwarteten Clubausflug gestartet.
Scho vorm Obfohn hot uns Christine im Zug mit am Gschenk überrascht und zwar hot jeda a T-Shirt mit der Aufschrift: Porta Nigra Tour 2007 kriagt. D’Freid war groß und meina Meinung noch hot Christine de Größn a ideal ausgewählt. Oba a po Beschwerden hots dann glei gebn: Charly hot gmoant, dass man in dem T-Shirt ihre Konturen so stark sehgt und d Hilde, dass sie liaba Größe S als M ghobt hät und des, obwoi da Martin sie aufklärt hot, dass S net glei für Sexy steht.
D Fahrt war lang oba kurzweilig, mia hamma vui gsehgn und es is a immer amüsanter wordn. Sche langsam hama uns dann a olle kennaglernt, nachdem me d Hilde noch ungefähr 4 Stunden Zugfahrt gfrogt hot, wos host du nommoi für an Nam?! Ha! d Weinprobe war doch erst für auf d‘Nocht agsogt?! Zur Abwechslung hamma dann mitm Richard und da Anna Schafkopft. Da Gipfe war, wia d Anna gsogt hot, sie spuilt mit da Herz Sau, wos ungefähr so is, wia wenn oana in am Mensch-Ärgere-Dich-Nicht plötzlich „Schach“ schreit.
Mittendrin hama dan in Koblenz umsteign miassn. Mia san scho mit Verspätung akemma, so dass ma hurtig wie dReh auf n nächsten Bahnsteig groast san. Kaum dort akemma, hern ma scho des Pfeifferl, de Tian schließn se. Da Schaffner sehgt die Menge narrischer, bayerischer Leit – Christine vora mit am total eigfrertn Gesichtsausdruck und losst uns no schnell in den letzten Wagon des Zuges. D Landschaft wird immer schena, vorbei am Felsn der Lorelei, an Burgen und Weinbergen der Mosel. D Vorfreude wird immer greßa.
Kurz vor fünfe san ma dann in Trier akemma. Des nächste Ziel is Pension Hotel Garni Grund direkt nebn da Porta Nigra. D‘Christine nimmt soglei sämtliche Schlissel in Empfang. Oba de Schlissel für Zimmer-Nr. 1 ham glei da Hans und i kriagt.. De andern san wahllos vergebn worn. Aiso, do hob i mi scho a bissal gwundert, „wos ist denn des für a tolle Sonderbehandlung?“ Des Zimmer war schwar in Ordnung. Wos wern denn de andern woi für Bude ham?
Um hoibe sieme san ma dann mit Taxis zu de Weinberge zur Winzerführung aufbrocha. Nochdem ma dann a bisserl a Wartezeit hignumma ham, weil uns da Winza uns irgendwie vergessn hot, is mit da Führung losganga. Es war wirklich interessant. Da Sebastian, so hot der junge Winza ghoassn, hot uns wirklich vui über dWeinberge, Rebsorten, Klima und die Lese erklärt, wobei dHilde dann efter moi zur Auflockerung beitrogn hot. So z.B. wia da Sebastian von Wildschweine, de in de Weinberge wüten, erzählt hot, worauf d‘Hilde de überaus berechtigte Frage gstellt hot: Warn des wuilde Hausschweine?
Ich woaß, dass ma vui glernt ham, oba im Kopf bhoitn ham mir Frauen auf jeden Fall hauptsächlich oans: de Tom Tailor Hosn vom Sebastian. Wobei anzumerken is, dass des Tom-Tailor-Markerl nur auf dem Wertesten Sebastians, i moan natürlich auf seiner Hosn, abrocht war; oba jede einzelne von uns Frauen hot gewusst, dass er a soichane Jeans aghobt hot. Des hamma dann oba olle erst bei da Weinprobe (wie viele Sorten warn’s nomoi?!) zugebn. Aiso diesa tolle Jeansjunge hot uns in sein Weinkella gführt, uns de verschiedensten Weinsorten und a tolles Essen, auf am offena Feia mit Reben- und Eichenholz gegrillt, serviert. Des Essn war delikat und d Christine is uns immer sympathischer worn, weil s so gut plant und zoit hot.
Während da Weinprobe hot se dann a außagsteat, warum mia bei da Zimmervergabe so bevorzugt behandelt worn san. Da Inhaber der Pension hot vorher bereits mit da Christine abgecheckt, dass des Zimmer Nr. 1 des Zimmer für etwas kleinere Personen is, aiso auf guat deitsch gsogt, des sogennante Zwergerlzimma. Ist des net gemein? No dazua, weils uns so ganz normal groß vorkemma is. Auf jeden Fall hama de Nocht im Zwergerlzimma guat umebrocht, während andere, de fast nix trunga ham, mit Kopfweh aufgwacht san.
Am Samstag um 10.00 Uhr war dann a Stadtführung geplant. Do ham a dann scho a paar Quertreiber ghobt, de gmoant ham, des war ja vui bequemer, wenn ma anstatt de Fiaß an Römerexpress nemma tatn. Oba weil ma mia ja imma friendshipmäßig nur nett zuananda san, hamma hoit dCharly, an Richard und dAnna mit dem Pemperlzug fohn lossn, der mi, i woas jetz a go net warum, irgendwie an den Proda von der Maiduilt, wißts scho, der glei am Anfang bei der oilten Nibelungenhalle, erinnert hot.
Und außerdem hot Charly mit ihra Kappn e vui bessa in den Zug einepasst wia zu uns. Obwoi – I kenn ja so a Mützn nur vom Rommel, dem Wüstenfuchs und wos tuat eigentlich da Rommel in am Römerexpress! A, is ja wurscht, Hauptsach de Mützn ist net mit uns mitganga.
Mia andern ham dann an dera Stadtführung teilgnumma, de wirklich sehr interessant war. Mia hama wirklich sehr vui erfahrn, von de Römerzeiten agfangt bis übers Mittelalter. Mia ham Bauwerke gsegn, de wirklich imposant warn, hama erfahrn, warum sovui Chinesen in Trier san, und dass me net aufan mit Petrus verzierten Kanaldeckel steign derf, weil’s sunst srenga afangt. Überoi in da Stodt san riesige Plastikfiaß aufgstellt, de de Originalgröße von a Statue in Rom demonstrieren. I hob me noch da Stadtführung wirklich gscheiter gfuit, was ja wirklich a amoi a guats Gfui is.
Um viertl noch oans hama uns dann an der Porta Nigra troffa zum „Geheimnis der Porta Nigra“.
Volla neigieriger Erwartung san ma dann in die Porta Nigra eiglossn worn. In am finstern Kellergewölbe hot uns dann a Zenturio in voller Montur lauthals begrüßt. Lauthals hoaßt net, der hot sche laut gredt, sondern der hot uns irgendwie angschrian, so dass ma direkt a bissl Angst ghobt hot. Er woilt uns zum Militärdienst einziagn, weil Rom de Weat regiern woilt und da Kaiser von Trier aus sImperium gführt hot. Plötzlich wars so, ois wart ma mia mittn drin in dera Zeit. Der Heerführer hot uns glei so an da Fuchtl ghobt, dass ma ois da hom, wos a gsogt hot. Soboid da Centurio „Seque“ gschrian hot, han eahm de Lateinkenner glei aufn Schritt ohne jegliche Zögerung gfoigt und de andern san voller Angst glei mitganga. Mia hamma dann schware Stoana schleppa miassn, da Hans und da Richard san zu Spähern ernannt worn und auf de Frage vom Centurio: „Was riecht ihr da draußen?“ hams glei sche brav Gallier gsogt statt Germanen. Menschenkenntnis hams a scho ghobt de Römer. So hot da Centurio an Werner ois an Bacchus bezeichnet und dHilde ois Venus (vielleicht hots a do a T-Shirt in Größe S aghobt?!) A religiöser Höhepunkt war a, wia ma do im zwoaten Stock von da Porta Nigra de Götter angruafa ham. Unten san de normalen Touristen umanandagstandn und mia ham do om sämtliche römische Götter agruafa. Da Centurio: Mars, du mächtiger Kriegsgott! und mia in voller Lautstärke: Nobiscum! – Merkur, Gott der Kaufleute…. Nobiscum… Oh, von so a regen Beteiligung kann da Papst nur trama!
Und a po Wochan später ob ses glaubts oder net, i woaß no genau, es war in da Nocht vom 11. Aufn 12. August hob i im Bett a ganz leise de Götter angefleht: „Justitia, Göttin der Gerechtigkeit, los bitte de Pockinger meine Schuah vergessen!“
Na, oba wieda zrück noch Trier:
Da Centurio hot dann zwischendurch amoi mit de Germanen kämpft, hot Kaiser, Krieger, Bischöfe, Barbaren und sogar Dämonen zum Leben erweckt. Aus „Seque“ ist zur Abwechslung dann „Move“ worn, wos oba genauso gwirkt hot. Mia san ma in a Verlies kemma, wo uns da Centurio spannend und gespenstisch sei Gschicht erzählt hot. De ganzen Geheimnisse der Porta Nigra san zum Vorschein kemma.
Also, man muaß wirklich sogn, des war a supa Führung, de ma so schnell net vergessn werdn. De hot wirklich an bleibenden Eindruck hintalossn.
I mecht nur wissen, wos dCharly ta hätt, wenn’s gwußt hätt, dass der Markus Friedmann, des is der, der den Centurio gspuit hot, scho ois Schauspieler in ihrer Lieblingsserie „Hinter Gittern“ mitgwirkt hot. De het se eahm bestimmt auf da Stea ois Sklavin unterworfa.
Noch dera Führung hamma dann Freizeit ghobt, wos ja a wirklich nötig war, weil – i sogs eich – man hots net leicht in am römischen Heer mit so am strenga Centurio. Letztendlich warn ma froh, dass ma do ohne Schaden rauskemma san. D’Silvia hot zum Beispiel an Kulturschock erlitten; de hamma troffa und do hots doch glatt a bissal bockt, weil da Günther se no an Dom aschaun hättn megn, sie oba statt scho wieda Kultur lieba zum Shoppen woilt, wos noch ihra Erklärung hoaßt „nur einegeh, eh nix kaufa“.
Um sechse hamma uns dann bei den Kaiserthermen troffa zum sogenannten „Verrat in den Kaiserthermen“. Marina hot scho an ganz an roten Kopf ghobt, weil ma a richtige Hitzewelle ghobt ham und so oba leider koa so Mützn wia Charly ghobt hot. Unser trotzdem anfängliche Angst, dass ma do in de Thermen vielleicht bodn dern und uns ausziagn miassn, war glei vaflogn, wia ma de Reste der Therme gsegn ham. A so a römischer Gehilfe hot uns durch a Gitter in des innere der ehemaligen Therme lossn, wo dann von so am Restal Turm plötzlich oana abogschrian hot: „Ihr kennt mich nicht!“ Und mia olle wia auf Kommando noch am Blick noch om, des is doch unser Centurio?: „Doooch!“ Da Centurio steallt se jedoch ohne jegliche Verwirrung jeatz ois Tribun Mallobaudes vor, der den Befehl hot, de Sicherheit von Trier wieda herzustelln und aus de nie fertig gstellten Thermen a Truppenlaga zu mocha. Vom Turm abagstiegn loßt a se zur Demonstration von da Silvia a Massage verabreichen, de do überhaupt koa Problem damit hot. I sog nur, dCharly, wenn gwußt hätt, ihr wißts scho wos…..
Von da Massage entspannt erzählt da Mallobaudus uns dann sei ganze Kindheitsgeschichte, führt uns durch de unterirdischen Anlagen der Therme. Scho am Vormittag hot uns de Stadtführerin de ganzen Einrichtungen dort erklärt, so z.B. dass de Römer wirklich scho de tollsten Anlagen ghobt ham wia a Clo mit fließendem Wasser. Do hot de doch glatt erzählt, dass die Römer do auf Bänken nebeneinander eahna Gschäft in a Rille mit fließendem Wossa verricht hobn und se do drin dann a greinigt ham. Des hot wirklich zu den komischsten Überlegungen gführt, so z.B. wia reinigt se a Römer?, hot a do an Schwamm? Oda a Birsterl? Wos is, wenn do grod des Gschäft vom Vormann vorbeirinnt? Antworten drauf hamma net kriagt, weil se hoit sowas ja koana so richtig frogn traut.
Mit der Geschichte von Trier nun vollends vertraut, san ma dann von oana von den Porta Nigra Zoomers abghoit worn, zFuaß zum Clublokal gwandert und warn ma dann eigentlich fix und fertig. I glaub, da Centurio hätt wesentlich mehr ausgricht bei uns wia der Caller, wos vielleicht a daran glegn is, weil ma uns eigentlich gfuit ham wia Römer noch a Schlacht mit de Germanen.
Mia ham dann nur sehnsüchtig auf die Afterparty gwart, de laut telefonischer Anweisung von der Christine überoi, nur net bei am Chinesen stattfinden soi. Also geht’s auf zum reservierten Afterparty-Lokal, am Chinesen. Noch am anfänglichen Ente-Stinksauer-Gsicht vom Martin und am ziemlichen Durchanander, weil’s Essen a scho ausgsuacht war, hot letztendlich dIris a bissal a Ruhe einebrocht. Sie hot so ganz unauffällig an Franz zum Martin gsitzt. De zwoa ham se dann a chinesisches Weizen bsteallt und ham glei drauf Kontakte mit a paar ältere Square-Dancerinnen geknüpft. Net, dass de zwoa auf ältere Frauen steh daten, oba ältere Frauen, de in am Männerkloster arbeiten, san natürlich scho wos bsonders. De Fragen san eahna go nimma ausganga vom Liebesleben der Pater agfangt über fehlende Unterhosen unter der Kutte. Am meisten beeindruckt hot eahna oba de 6-tägige Schweigezeit, wobeis gmoant ham, des wart für uns Frauen net schlecht. Mia warn eigentlich schweigend nur froh, dass da Abend gerettet war. Mia hamma guat chinesisch gspeist und de zwoa ham einfach nur glocht. Na ja, vom Fleisch sans deswegn a net glei gfoin –obwoi, wenn i an Martin so aschau…..
Nochdem ma dann no a bisserl in am Straßencafe direkt neben der Porta Nigra gsessn san, han ma dann saumiad in unser Zwergerlbett einegfoin.
Am Sonntag noch am hervorragenden Frühstück ham ma dann wehmütig unsere Taschen packt.
Bei da Heimfahrt hama glei Pläne für den nächsten Clubausflug geschmiedet. Agfangt von am Flug irgendwohi über a Kreuzfahrt im Mittelmeer, ois is do firakemma. Geld hättma ja gnua. D’Hilde is nur mehr umananda glegn mit den Worten „I bin platt wia a Luftmatratzn!“ Außerdem hot sa se erhoin miassn, i zitier: „von de Blosen an de Fiaß, obwoi i go koane Schua aghobt hob“.
„Apropo Schuah, Justitia, Göttin der Gerechtigkeit, du woaßt scho wos!“
D’Zugfahrt war irre lang, zumoi mia dann a poarmoi hoitn und wartn ham miassn wega „spielender Kinder am Gleis“. Oba wenn ma so in am stehenden Zug sitzt in da Pampa, suacht ma se hoit irgenda sinnvolle Beschäftigung. Und seis nur des Beobachten vom Zugclo.
Do wearn de schlimmsten Überlegungen agstellt, weil da Franz ois ersts aufs Clo geht, do drin oba koan römischen Schwamm zum Obbutzen findt und Angst hot, dass des Ding net runtergeht. Unmittelbar noch eahm geht a Bua ins Clo; draußen leicht des Besetzt-Licht auf, da Franz moant, des kann nur hoaßn, dass do drin radioaktiv ist. Daraufhin muaß natürlich da Martin de Lage peilen, verabschiedet se von der Christine: „Tschau, Puppe, falls ma uns nimma seghn“! und de Gaudi is natürlich perfekt.
Zwischendrin is de Klimaanlage im Zug defekt. Draußen hots über 30 Grod, drinn kannst koa Fensta aufmocha und d’Klimaanlage ist hi. Uns wird imma heaßa und heaßa. Oba beruhigenderweise kimmt a Zugbegleiterin daher, schnauft oamoi kurz bei da Tia eina und sogt im geh:„Oah, Ihr habts ja boid koa Luft mehr!“ – – Echt beruhigend. i segh scho de Schlagzeile in da Bild-Zeitung: 25 Square-Dancer in Zug erstickt. Andererseits bin i froh, dass des a Zugbegleiterin is und koa Stewardess. Ois dann de Klimaanlage wieder in Ordnung war, hamma ois Entschädigung kostenlose Getränke aus‘m Speisewagen kriagt und d‘Charly hot uns dazu a Vorführung ihrer Gummistrümpfe gliefert. Aiso, wenn des koa Service is! Nochdem dann de spielenden Kinder (vielleicht warns ja doch de streikenden Lokführer) vom Gleis weg warn und da Martin hurtig „Gib Gummi, Zug“ gschrian hot, samma mit ziemlicher Verspätung doch no in Passau akemma.
Also i muaß sogn, es war a pfundiger Clubausflug, den dChristine super organisiert hot, mia hamma vui erlebt, de Gemeinschaft war sche und es hot richtig Spaß gmocht. Und i wünsch ma, dass me net nur d’Justitia erhört, sondern dass ma no vui so schene Stunden mitananda erlebn wia mia in Trier.
